أغرب عادات وتقاليد رمضان في أذربيجان.. تعرف عليها في ” فانوس رمضان”  علي راديو 99 إف إم

تقدم إذاعة 99 إف إم برنامج فانوس رمضان يوميا طوال شهر رمضان والذي يتناول العادات والتقاليد الخاصة بكل دولة في شهر رمضان المبارك .

و البرنامج من إعداد المذيعة مروي حلمي وتقديم نخبة من مذيعات ومذيعي راديو 99 إف إم و تحت إشراف المذيع ومدير المحطة الإذاعية أحمد شبانة .

ويقول شبانة أنه يحرص دائما علي إنتاج برامج إذاعية متنوعة لنيل رضا المستمعين بتقديم  محتوي متنوه هادف لافتا إلي أن الهدف الأساسي للراديو هو إرضاء المستمعين بكل ما هو جديد وهادف .

رمضان في أذربيجان

تقول مروة:” أذربيجان من أجمل واحلي بلاد العالم واتسمت بلاد البحيرات، لان اذربيجان تقريبا لوحدها فيها اكتر من 240 بحيرة، و المسلمين فى اذربيجان هم الاكترية فعددهم تقريبا ٩ مليون نسمة من أصل ١٠ مليون مواطن اذربيجاني (يعنى ٩٥%) مسلمين، ويتكلموا اللغة الأذارية وهم من أقدم الشعوب وعلى فكرة عادتهم وتقاليدهم قريبة منا كعرب وشبهنا شوية وهى قريبة من تركيا وإيران”.

“ومع قرب رمضان، تبدأ الشوارع والمحلات والبيوت بتعليق الزينة احتفالا بقرب الشهر الكريم وخاصة فى العاصمة باكو، وتلاقى المحلات بدأت تعرض كراتين وصناديق البلح والرطب عشان رمضان، وقبل رمضان بأسبوع فيه فولكلور بيتعمل بين الشباب والعائلات بيتميز بها الشعب الاذاري وهى سباقات الخيل اللي بيعتبروها مسابقة ما بينهم كاحتفال فلكولورى قرب دخول رمضان”.

” وفي رمضان فيه فاعليات وأنشطة كتير في باكو، فنلاقى كل يوم فيه أُمسيات دينية بتتعمل ويحضرها مواطنين كتير وكمان من الجاليات التانية اللي عايشين في اذربيجان وتنتشر الدروس والخطب الدينية للدارسين اللي جامعة الأزهر غالبا بتكون بعتاهم هناك للدعوة، و الحقيقة فيه عادات جميلة للشعب الاذاري بتميزه عن غيره من الشعوب في رمضان، فمثلا عندهم في رمضان عادة النذور، ودي بتركز على الوفاء بالنذر اللي بيقطعوه على نفسهم في رمضان زى مثلا زيادة العبادة، كثرة الدعاء، نذر صيام بعد رمضان”.

“وساعة الفطار من أجمل العادات اللى عجبتنى هى ان ترابيزة الفطار فى رمضان لازم هتلاقى طبق زيادة عن عدد أفراد الأسرة على الترابيزة، وده ليه، عشان  يكونوا مستعدين لو فيه أى ضيف جه فجأة يلاقى فطاره معمول حسابه، اما بقى قبل الفطار، فتلاقى العيلة متجمعة قبل آذان المغرب حوالين واحد من العيلة يكون غالبا بيعرف اللغة العربية ويبدأ يقرأ عليهم القرآن بالعربي وبعدين يشرح لهم باللغة الاذارية معنى الآيات، وده مشهد في منتهى الجمال للعيلة وهى متجمعة على الذكر وتلاوة القرآن”.

” وييجى المغرب ووقت الفطار، اللي غالبا بيكسر فيه الاذربياجيون صيامهم على المية والتمر وممكن شوية مكسرات أو عجينة اللوز والبقلاوة عشان الطاقة بعد صيام طويل، والاهم أن ده بيكون مع الشاي ، وبعدين يصلوا المغرب وبعد الصلاة يجى وقت الأكل، نبدأ الفطار مع طبق الشوربة اللى يعتبر أساسي وضروري، وبعد الشوربة من أشهر الأكلات نلاقى الضلحة وهى خليط كده من ورق العنب واللحم الضأني والبصل ومعاه الخضروات المقطعة والحمص والتوابل، وكمان من أهم الأطباق طبق القاوورما، اللي بيتعمل من الفراخ أو اللحمة أو السمك بس بيتضاف له الفواكه المجففة والخضروات والزعفران والكركم والبهارات”.

“ويعتبر سمك الكوكو المدخن من أهم المأكولات اللذيذة اللى بيحبها الشعب الاذاري، واصلا المطبخ الاذربيجاني هنلاقيه خليط من المطبخ الإيراني والتركي وده زى ما قلنا لقرب اذربيجان منهم، وتحرص دايما الأسر والجيران بينهم وبين بعض أنهم يقدم أطباق الأكلات المختلفة كتعبير عن صلة الرحم وود الجار في شهر الخير، ومساعدة الأسر الفقيرة والمحتاجين، وكل رمضان بيتعمل مائدة إفطار جماعية كبيرة بيعملها غالبا المفتى الاكبر فى البلد ويدعو لها رئيس الجمهورية وأعضاء الحكومة وأئمة كل الطوائف الدينية هناك لتوطيد العلاقة بين كل الشعب وتعزيز قيمة وروح الود في رمضان.

كل سنة وأهل أذربيجان كلهم بخير، وينعاد عليهم وعلينا وعلى المسلمين الأيام بخير.