” فانوس رمضان” في لبنان.. وأغرب العادات الرمضانية علي راديو 99 إف إم

تقدم إذاعة 99 إف إم برنامج فانوس رمضان يوميا طوال شهر رمضان والذي يتناول العادات والتقاليد الخاصة بكل دولة في شهر رمضان المبارك .

و البرنامج من إعداد المذيعة مروي حلمي وتقديم نخبة من مذيعات ومذيعي راديو 99 إف إم و تحت إشراف المذيع ومدير المحطة الإذاعية أحمد شبانة .

ويقول شبانة أنه يحرص دائما علي إنتاج برامج إذاعية متنوعة لنيل رضا المستمعين بتقديم  محتوي متنوه هادف لافتا إلي أن الهدف الأساسي للراديو هو إرضاء المستمعين بكل ما هو جديد وهادف .

رمضان في لبنان

تحتفل لبنان بشهر رمضان بشكل مختلف عن باقي الدول الإسلامية الثانية، وده لان لبنان بلد عريقة وبتضم عرقيات وقبائل مختلفة، ده غير إن المسلمين والمسيحيين فيها متعايشين مع بعض بشكل يوضح الوحدة الوطنية في احلي صورتها، فأول ما بتثبت رؤية هلال رمضان بينطلق المدفع في شكل ٣ قذائف وضربات ورا بعض تعلن عن رؤية هلال رمضان وعلى فكرة نفس الحاجة بتحصل مع رؤية هلال شوال لثبوت عيد الفطر .

أما ساعة الإفطار والسحور فالمدفع بيضرب مرة واحدة بس يعلن عن وقت المغرب والإمساك، والتقليد ده مشهور جدا في مدينة بيروت وطرابلس واللي يتولى ضرب مدفع رمضان الجيش اللبناني.

ومن أشهر العادات اللي بتميز رمضان في لبنان هي استبيانة رمضان ودى من التقاليد الرمضانية المتوارثة في لبنان وهى عادة قديمة مستمرة لحد النهاردة

بيخرج فيها الناس للشواطئ للأكل والشرب والحلويات  وده بيكون في اليوم الأخير من شعبان احتفالا بقدوم رمضان وقبل ما الصائمين ينقطعوا عن الأكل والشرب في الشهر الفضيل.

وبتفضل معظم المطاعم والمحلات مفتوحة في نهار رمضان ولكن غالبا الناس بتمتنع عن الأكل والشرب والتدخين خاصة في المناطق اللى فيها أغلبيتها مسلمين .

ومن الطبيعى والعادى جدا فى لبنان انك تلاقى أسرة مسلمة عازمة ناس غير مسلمين على الإفطار عشان يفطروا سوا ويستمتعوا بجو رمضان وده لان من زمان لبنان بلد فيها روح الوحدة الوطنية وزى ما قلنا هم متعايشين مع بعض بشكل متسامح وجميل جدا.

وساعات كمان تلاقى العائلات المسيحية والجمعيات الخيرية والمنظمات الأهلية بتعمل موائد إفطار جماعي للكل مسلمين ومسيحيين ودي بيحضرها عادة كبار رجال الدولة وساعات رئيس الدولة والزعماء المحليين كصورة من صورة التضامن والتكافؤ الاجتماعي بين الشعب اللبناني وتعزيز قيمة الوحدة الوطنية بينهم فالدين لله ولبنان للجميع.

أما بقى الأكل اللبناني فالله على الجمال، كلنا طبعا عارفين المطبخ اللبناني وحلاوته واكلاته اللذيذة، واللي على رأسهم سلطة الفتوش والتبولة والفتة وشوربة العدس والحمص بالطحينة وسلطة المتبل اللي هى بابا غنوج بتاعنا بس عليها رمان وسماق ودى بجد رهيبة،وكمان فيه الصيادية والشاكرية اللبنانية، والكبة المقلية وورق العنب والمشاوى اللبنانية والملوخية اللبنانية اللي مختلف عن بتاعتنا شوية.

أما الحلويات ” بقى فحدث ولا حرج لا تُقاوم قطايف تلاقى.. كنافة تلاقى.. كولاج بكل تكاته وحركاته وطبعا المكسرات أساسية على ترابيزة رمضان اللوز والجوز والفسدق،ومعاهم بقى العصاير اللبنانية على الفطار وأشهرهم الجلاب وده شبه الكركديه بتاعنا بس بيبقى عليه مية ورد، والعرقسوس والتمر هندي “.

ويحيي المسلمون في لبنان ليالي شهر رمضان في المساجد والزوايا والتكايا بالصلاة والدعاء وتلاوة القرآن الكريم، وكتير منهم حريص على صلاة التراويح وخاصة في العشر الأواخر والليالي الفردية منها ويفضلوا يصلوا ويذكروا ويدعوا لطلوع الفجر وبعد التراويح ينطلق الناس للشوارع أما للشراء من الأسواق أو السهر في الأماكن العامة وحضور فاعليات رمضان في الشارع، والزيارات اللي بتفضل في لمة الأصحاب والجيران والأهل لحد الفجر.

وطبعا مننساش المسحراتي اللحى  بيعتبر من التقاليد الموروثة لحد النهاردة في مناطق كتير ويفضل يلف على البيوت بطبلته اللي يخبط عليها يصحي الناس وينادى يا نايم وحد الدايم، ويا ناس قوموا على سحوركم رمضان جه ليزوركم.

كل سنة وأهل لبنان كلهم بخير، وينعاد عليهم وعلينا وعلى المسلمين الأيام بخير .