نجلاء فتحي لـ ” 99 إف إم “..
أحلامي بدأت بـ ” شاكوش ومسمار ” وبكملها بـ ” سرالمهنة”
الراديو.. السهل الممتنع.. حلم حياتي و إن شاء الله هحققه
كتبت أمينة العناني
تقول نجلاء فتحي في بداية حديثها لـ” 99 إف إم “:” أنا ليسانس آداب وتربية دراسات حرة لتصميم الأثاث الداخلي جامعة دمياط، ولأني من دمياط فكان تخصص الإعلام صعب، وكان صعب أني أغترب وأسرتي كانت رافضة سفري.. لكني دلوقتي ابتديت أحقق أحلامي ” .
و تكمل لـ ” 99 إف إم “، قائلة:” دلوقتي أنا في القاهرة، الوضع أتغير، و أقدر ابتدي أحقق حلمي.. وأسرتي كلها مبسوطة بمشواري وشايفين أنها خطوة حلوة في حياتي”.
وتضيف قائلة:” طول عمري كنت بحب اسمع الراديو وأنا بعمل كل حاجة .. الراديو كدة حالة لوحده.. مش متشاف وبيوصلك معلومات كتير ويخليك تتخيل كل حاجة.. اللي بيقدموا واللي بيمثلوا.. وتحس برد الفعل معاهم.. بحس أن الراديو السهل الممتنع معاك في أي وقت وكل مكان و ممكن بخيالك تسرح مع الأصوات اللي خارجة منه وصعب جدا لان مش أي حد يقدر بصوته يوصلك المعلومة “.
وعن تجاربها السابقة في الميديا تقول :” كنت بعمل فقرات في برنامج رضوي الشربيني ” هاند كرافت و هاند ميد ” مصممة ديكور، لكن أنا نفسي أعمل حاجة معينة نفسي اعمل حاجة خاصة بيا”.
وعن مشوارها الإذاعي تقول:” ليا تجارب في 99 إف إم برنامج ” شاكوش ومسمار ” وكنت بحاول اعرف فيه الناس بخبراتي وخبرة المتخصصين أي حاجة محتاجين يعرفوها واللي عندي مشكلة أو استفسار كنت بجاوب عليه المهم أننا نشتغل علي نفسنا ونكمل اللي ناقص فينا “.
وتضيف :” من أهم الصعوبات اللي بقابلها دلوقتي في حياتي إن الميديا متعبة شوية ومش بيتحقق فيها النجاح بسرعة لا.. خطوة خطوة وده أحسن، كمان محتاجة طولة بال ولازم يكون عندك وقت و لو مش بحب الشغل ده مش هقدر أكمل و علي الأقل محتاجة سنة واتنين واكتر علشان أقدر أوصل ، كمان الراديو كان الفترة اللي فاتت مش واخد مكانته، دلوقتي الراديو رجع ياخد مكانه تاني زي الأول والناس بقت تسمعه اكتر وتتابعه”.
وتكمل قائلة:” ليا أمثال عليا كتير في الإذاعة من أهمهم المذيع الرائع” أسامة منير المريح” في صوته راحة مش معقولة، والمذيع المبدع “خالد عليش” بحبه جدا بيضحكني جدا ويخليني متفاعلة معاه في كل اللي بيقوله” .
وتضيف :” بحلم أقدم حاجة مختلفة عن الموجود علي الساحة، مثلا برنامج عن ” الخواطر ” وأتكلم فيه مع الناس زي برنامج الأستاذ أسامة منير، فرحانة ان دلوقتي نبرة صوتي بقت مميزة والناس بتعرفني وتميزني و أن شاء الله ناوية أكمل وأخد كورسات و اشتغل علي نفسي اكتر علشان أحقق اللي نفسي فيه وبحلم بيه” .
وتقدم نصيحة لزملائها قائلة في الوسط الإعلامي :” النصيحة دي ليا أنا كمان.. وهي أن صاحب بالين كذاب فلازم الإنسان يركز علي شغل واحد علشان ينجح فيه و يحقق فيه أحلامه “.
و أنهت نجلاء فتحي كلمته بتوجيه شكر خاص للمذيع وصاحب المحطة الإذاعية ” 99 إف إم “، أحمد شبانة، قائلة:” اوجه كلمة شكر للأستاذ احمد شبانة مدير المحطة لأنه يستاهل كل الكلام الحلو و يستاهل احترام جميع من حوله وهو من الشخصيات اللي بتساعد كل اللي حواليها لما حد بيشتغل معاه مش بيبخل عليه بأي معلومة و بيقدم المساعدة اللي يقدر عليها وبجد يا رب أشوفه أحسن إنسان في الدنيا و يارب راديو ” 99 إف إم ” يكون أحسن راديو في الدنيا ويكون في أحسن حال هو وأسرته دايما ” .
